Милан официјално го објави назначувањето на новиот тренер Серџо Консеисао, кој го наследува на функцијата отпуштениот негов сонародник Пауло Фонсека. Договорот на Португалецот е со времетраење од една и пол година.
На овој начин, 50-годишниот тренер се враќа во Серија А, лига која одлично ја познава од времето кога беше фудбалер. Токму во италијанската елита тој го помина најголемиот дел од својата играчка кариера, играјќи за три клуба – Лацио, Парма и Интер. Во Серија А одигра вкупно 137 натпревари, постигна 13 гола и запиша 21 асистенција.
Најзапаметен беше неговиот период во Лацио, каде освои пет различни трофеи: титулата во Серија А, двапати Купот на Италија, Суперкупот на Италија, Купот на националните купови и Суперкупот на Европа.
Сепак, назначувањето во Милан ќе биде првото тренерско искуство на Консеисао во италијанскиот фудбал. Досега беше тренер само во Португалија, предводејќи клубови како Олханензе, Академика, Брага, Гимараеш и Порто, како и во Франција, каде кратко време го тренираше Нант. Бившиот португалски репрезентативец мина седум години како тренер на „змејовите“, со кои освои вкупно 11 трофеи, вклучувајќи три титули во португалското првенство.
Консеисао го напушти „До Драгао“ ова лето поради доаѓањето на Андре Вилјаш-Боаш за претседател.
Консеисао ќе има тешка задача да го стабилизира и подобри тимот на Милан, кој пред сезоната имаше шампионски амбиции, но сега се наоѓа на осмото место во Серија А, со 14 поени заостанување зад лидерите во табелата, кои имаат одиграно натпревар повеќе.
Интересно е што во својот дебитантски натпревар како тренер на „росонерите“, Консеисао ќе се соочи со Јувентус, каде игра неговиот син Франсиско Консеисао. Младиот играч исто така го напушти Порто ова лето поради заминувањето на неговиот татко. Натпреварот е полуфинале за Суперкупот на Италија и ќе се одигра на 3 јануари, петок, во Саудиска Арабија.
