Тренерот на Барселона, Ханси Флик, го поздрави враќањето на играчот од средниот ред, Френки де Јонг, кој ќе биде достапен за утрешниот натпревар во Лигата на шампионите против Јанг Бојс.
Де Јонг, кој е и член на холандската фудбалска репрезентација, ќе биде дел од тимот против Јанг Бојс, актуелниот шампион на Швајцарија, a Флик смета дека 27-годишниот играч, кој беше надвор од теренот од април поради повреда на зглобот, е подготвен повторно да игра.
„За нас е многу важно што можеме да сметаме на Френки, без разлика дали ќе одигра само пет или десет минути“, изјави Флик на прес-конференцијата и додаде дека играчот е подготвен да му помогне на тимот.
Флик истакна дека Де Јонг нема да игра 45 минути, туку пократко, и дека ќе му користи враќањето на теренот.
Покрај враќањето на Де Јонг, по репрезентативната пауза се очекува и Гави да биде во конкуренција за натпреварите по едногодишна пауза, а тогаш ќе се вратат и Дани Олмо и Фермин Лопез, кои имаа кратка пауза поради полесни повреди.
Натпреварот меѓу Барселона и Јанг Бојс е закажан за утревечер со почеток во 21:00 часот.
