Менaџерот на Манчестер Сити, Пеп Гвардиола, зборуваше по поразот на неговиот тим со 0-2 од Ливерпул во натпревар од 26. коло на англиската Премиер – лига.
„Игравме многу добро. Можеби ни недостигаше повеќе завршница во однос на ударите, но игравме против одличен тим. Можеби шансите беа 50-50 на почетокот, но не успеавме да ги искористиме“, изјави Гвардиола.
Поразот ја зголеми разликата на дури 20 бода до врвот за „граѓаните“, нешто што не се случило досега во ерата на шпанскиот стратег.
„Ливерпул се бранеше многу длабоко во второто полувреме. Пробавме нешто што не сме правеле во многу натпревари: го потиснавме противникот назад во неговиот шеснаесетник и се обидовме да го пробиеме. Тактиката беше да стигнеме до завршната третина, често успевавме, но не постигнавме гол. Ни недостигаше следниот чекор, а беше речиси невозможно да ја оствариме целта со центрирања, имајќи ги предвид физичките предности на нивните дефанзивци. Не можевме да го најдеме вистинското решение“, додаде Гвардиола.
Ливерпул славеше на „Етихад“ како вистински шампион и се оддалечи со 11 бода на врвот.
Покрај тоа, „граѓаните“ се наоѓаат на четвртото место, со ист број бодови како и петтопласираниот Њукасл, што им го загрозува местото во Лигата на шампионите следната сезона.
„Знам дека луѓето нема да поверуваат, но јас знам кога играме навистина добро. Токму така одигравме против Ливерпул“, нагласи Гвардиола.
Тренерот на Сити зборуваше и за отсуството на една од најголемите ѕвезди на тимот, Ерлинг Халанд.
„Не велам дека не остваривме резултати затоа што Ерлинг не беше тука. Тоа би било неправедно кон останатите играчи. Можевме подобро да ги реализираме шансите, но генерално сè беше во ред“, истакна Гвардиола.
На крајот, тој изрази оптимизам за иднината на неговиот тим и верува дека е само прашање на време кога играчите ќе почнат да бележат позитивни резултати.
„Ако губиме, нека губиме како што загубивме сега. Гледам многу знаци дека овој тим има светла иднина, со оглед на тоа кои играчи ги имаме. Освен Кевин Де Бруин и можеби Нејтан Аке, сите се многу млади. Што и да одлучи клубот за иднината, таа е светла. Некои од поискусните играчи ќе останат и следната сезона, но мора да се подготвиме за следниот чекор. Тоа е само прашање на време“, заклучи Гвардиола.
