Гостивар ја шокираше Шкендија во финишот, Вардар ја тресна Брегалница и веќе не е на дното

Шкендија не го искористи доволно ремито меѓу Струга ТЛ и Шкупи, со оглед дека тие ремизираа 2-2 против Гостивар. Со тоа тетовци не се доближија дополнително во трката за шампионската титула. Гостивар покажа дека е сериозен ривал.

Аденис Шала во 37.минута го отвори резултатот во корист на тетовци, а во 69.минута постигна уште еден гол за 2-0.

И ако сите помислија дека мечот е решен, Ланре Кехинде и гостиварци не мислеа така. Кехинде со два гола од пенал, во 86. и во 91.минута успеа да израмни на 2-2 и да донесе бод за гостите.

Најтрофејниот македонски клуб Вардар во дербито на дното ја совлада Брегалница со 2-0 и ја напушти последната позиција на табелата. Сега „црвено-црните“ се десеттопласирани со 21 бод, три повеќе од Македонија ЃП. Марјан Алтипармаковски од пенал постигна погодок за водство во 21.минута, а три минути подоцна Дарко Глишиќ постигна и втор гол за вардарци, што на крајот беше сосема доволно за триумф.

„Лавовите“ го забележаа и вториот пораз оваа пролет, и тоа убедлив на гости кај Брера (3-0). Матеј Цветаноски во третата минута донесе водство, Даниел Миловановиќ зголеми на 2-0 во 12.минута, а третиот гол беше дело на Ѓорѓе Ивковиќ во 42.минута.

Тиквеш го победи Работнички со 2-0. Во 17.минута, Бразилецот Нето со удар со глава по корнерот од десната страна обезбеди предност за кавадарчани, а Кристијан Стојкоски во 52.минута зголеми на 2-0 и практично го реши победникот.

Воска Спорт и Силекс ремизираа без голови на дуелот во Охрид.

Во дербито на колото кое се одигра вчера, Струга ТЛ и Шкупи ремизираа 2-2.

ПРВА ЛИГА, 20.КОЛО – РЕЗУЛТАТИ
ШКЕНДИЈА – ГОСТИВАР 2-2
ВАРДАР – БРЕГАЛНИЦА 2-0
БРЕРА – МАКЕДОНИЈА ЃП 3-0
ТИКВЕШ – РАБОТНИЧКИ 2-0
ВОСКА СПОРТ – СИЛЕКС 0-0
ВЧЕРА: СТРУГА ТЛ – ШКУПИ 2-2