Крилниот напаѓач Џулијан Дракслер е нов играч на катарскиот Ал-Ахли, објави клубот кој го ангажираше од Пари Сен Жермен. Проценетата вредност на зделката е околу 20 милиони евра, а договорот на 29-годишниот играч е до летото 2025 година.
Дракслер со тоа станува вториот играч овој месец кој го напушта ПСЖ за да игра во Катар. Пред тоа истото го направи и Марко Верати, но се пресели кај конкурентот Ал-Араби.
Интересно е што првично се мислеше дека поранешниот германски репрезентативец одбил да се приклучи на Ал-Ахли, но очигледно се предомислил.
Шампионот од Светското првенство во 2014 година им се приклучи на парижаните во 2017 година, кога за него му платија на Волфсбург 36 милиони евра. Дракслер одигра вкупно 198 натпревари за ПСЖ со 26 гола и 41 асистенција.
Минатата сезона беше на позајмица во Бенфика каде на 18 натпревари постигна само два гола.
