Осман Дембеле отпадна од составот на Франција за претстојните натпревари во Лигата на нации. Mеѓу 14 и 17 ноември, „триколорите“ ќе се соочат со Израел и со Италија.
Дембеле има повреда на бутниот мускул, која ја заработи на натпреварот на Пари Сен Жермен против Анже за време на викендот. Иако повредата не е сериозна, тој нема да биде закрепнат навреме за натпреварите на националниот тим.
На местото на Дембеле, селекторот Дидие Дешамп го повика крилото на Баерн Минхен, Кингсли Коман.
Од составот на „триколорите“ исто така е отсутен и Весли Фофана, кој беше заменет со Бењамин Павар.
