Шпанија и Франција во вторник во 21 часот во Минхен ќе играат во полуфиналето на Европското првенство. Шпанците по продолженија со 2-1 ја елиминираа Германија, додека Франција по подобро изведување пенали ја елиминира Португалија.
Шпанскиот селектор Луис де ла Фуенте има големи проблеми пред полуфиналниот натпревар. Поради црвениот картон нема да игра Дани Карвахал, а ќе недостасува и стандардниот стопер Робин Ле Норман, додека против Германците се повреди и Начо, но тој би требало да биде подготвен.
Натпреварот сигурно ќе го пропушти Педри, кој во осмата минута го напушти теренот откако го повреди коленото, а го замени Дани Олмо.
Играчот на Лајпциг постигна гол и забележа асистенција, но пред крајот на натпреварот и тој се повреди и е неизвесен за настап против Франција.
Шпанскиот весник „АС“ пишува дека Дани Олмо сепак треба да биде подготвен за натпреварот, но дека шпанските физиотерапевти ќе имаат полни раце работа до вторник навечер.
