Фудбалерот на Арсенал, Букајо Сака, би можел да се врати на терен веќе следната недела на натпреварот против Фулам во Премиер – лигата, пренесува „Би-би-си“.
Дваесет и тригодишниот англиски репрезентативец е надвор од терените од декември, кога заработи повреда на тетивата на мечот против Кристал Палас, по што мораше да биде подложен на операција.
Од Арсенал претходно информираа дека процесот на опоравување тече според планот и дека, освен ако не дојде до некои непредвидени компликации, Сака ќе биде подготвен за натпреварите од Лигата на шампионите против Реал Мадрид во април.
Исто така, британските медиуми минатата недела објавија дека Арсенал е подготвен да му понуди нов договор на Сака со подобрени финансиски услови.
