Македонија со изменет состав го стартуваше мечот против Естонија во Талин, но се покажа дека сепак тоа не е решение кое ќе може да се користи и во иднина. На крајот мораа да влегуваат Пандев, Барди, Несторовски, за да ја спасуваат селекцијата од пораз.
Осум измени направи селекторот Игор Ангеловски во првите 11 за гостувањето во Талин. Дел од стартерите со Косово беа повредени, Муслиу суспендиран, а секако и заморот го направи своето. Голманот Столе Димитриевски мораше да остане во изолација иако на крајот се покажа дека е негативен на коронавирусот. Но, јасно е дека квалитетот е сосема поинаков кога во игра е капитенот Горан Пандев, кога со играта диригира Енис Барди, а многу недостасуваше и повредениот Аријан Адеми во средниот ред.
