Фудбалерот за врска на Реал Мадрид, Џуд Белингам, смета дека победата на Арсенал е целосно заслужена и дури призна дека неговиот тим се извлекол од уште потежок пораз на „Емирати“.
„Кралевите“ загубија со 3-0 во првиот натпревар од четвртфиналето на Лигата на шампионите и се на чекор до елиминација од турнирот.
„Факт е дека не бевме блиску до позитивен резултат. Домаќините беа навистина добри. Јасно е дека два од головите дојдоа по слободни удари и беа резултат на индивидуално мајсторство, но искрено, можеа да ни дадат и повеќе голови. Имавме среќа што примивме само три“, изјави Белингам.
Англискиот репрезентативец, сепак, се надева на многу поинаков реванш.
„Сепак, ни претстои реванш и веќе размислуваме за него. Свесни сме дека ќе мора да направиме нешто неверојатно, нешто лудо. Но ако тоа може да се случи некаде, тогаш тоа е само на нашиот стадион „Сантијаго Бернабеу“, изјави Белингам.
