Менаџерот на Арсенал, Микел Артета изјави дека неговиот тим не заслужил да загуби од Астон Вила во Премиер – лигата.
„Игравме навистина добро, мислев дека сме подобри и не заслуживме да го загубиме натпреварот, но тоа е фудбалот“, изјави Артета за „Скај“.
Фудбалерите на Арсенал загубија синоќа во Бирмингем од Астон Вила со 1-0 и пропуштија можност да го заземат првото место на табелата.
Каи Хаверц постигна гол во 90. минута, но по употребата на ВАР технологијата голот беше поништен поради офсајд.
Артета на прес-конференцијата по натпреварот беше прашан и за поништениот гол и евентуалната казна.
„Јасно и очигледно“, прокоментира тој.
Од него беше побарано да го објасни одговорот, дали смета дека одлуките се погрешни или ситуациите не се очигледни за да се промени одлуката на судијата.
„Тоа е она што јас го мислам, јасно и очигледно. Тоа е мое мислење, тоа е сè што ќе кажам“, додаде тој.
„Навистина сум горд на начинот на кој одигравме на овој стадион против овој тим. Заслуживме да победиме, но мора да бидете подобри во шеснаесетникот, а и работите мора да одат по ваш начин“, заврши Артета.
