Антонио Конте ќе добие отпремнина од 4 милиони фунти откако беше отпуштен од Тотенхем пред да му истече договорот на крајот на сезоната, пренесуваат медиумите на Островот.
Двете страни решија да се разделат по променливите резултати на Тотенхем во последно време и особено по изјавите на Италијанецот по последното реми (3-3) против Саутемптон, кога ги обвини играчите за недостаток на желба за победа, но не штедеше критики и за раководството на клубот, особено за претседателот Даниел Леви.
Тотенхем моментно е четвртопласиран на табелата со 49 бода, но Њукасл е на петтото место со само два бода помалку, но и со два одиграни натпревари помалку. Клубот до крајот на кампањата ќе го водат помошниците на Конте, Кристијан Стелини и Рајан Мејсон. Интересно е и тоа што Конте само по отказите од Челси, Интер и Тотенхем доби отштета од 37 милиони фунти.
