Македонија е дојдена во Тбилиси да победи и да се пласира на Европско првенство. Селекторот Игор Ангеловски го повика капитенот Горан Пандев јавно на прес – конференција утре да го предводи нашиот национален тим до најголемиот успех во историјата.
„Ако е некој заслужен зошто Македонија ќе игра финале за Европско првенство, тоа е Пандев. Тој е наша „икона“, Горане ти посакувам утре да ги предводиш браќата до пласман на ЕП. Знаеме колку тоа ни значи на сите нас, и на цела Македонија. Ја респектираме Грузија, го респектирам селекторот Владимир Вајс кој направи одлични резултати, имавме два нерешени дуели, но утре ќе мора да има победник, а влогот е огромен. Ќе го подготвам тим на најдобар начин, мотивација не е ни потребна, затоа што финале се игра да се добие, со срце и со огромно залагање на секој дел од теренот. Верувам дека Македонија ќе слави на крајот. Тука сме сами, но ја чувствуваме поддршката од сите Македонци и ќе играме за да успееме“, изјави селекторот Игор Ангеловски.
