Играчот од средниот ред на Реал Мадрид, Лука Модриќ, призна дека не е задоволен од малата минутажа што ја добива од почетокот на сезоната. 38-годишниот Хрват сѐ помалку е во стартниот тим на Карло Анчелоти и се надева дека тоа ќе се промени.
„Тоа секако е нова ситуација за мене. Не играм толку често како порано, и колку што би сакал. Знаете дека сакам секогаш да бидам на теренот, не сакам брејкови и брејкови, само сакам да играм. Не ми се допаѓа тоа што се случува. Да бев во лоша физичка форма, ќе беше поинаку, но се чувствувам одлично и сакам да играм ако треба, на секои три дена“, изјави Модриќ на прес-конференцијата на Хрватска во пресрет на квалификацискиот натпревар против Турција.
„Она што се случува околу мене е нормален процес. Јас го сфаќам така. Морам да се прилагодам на ситуацијата и да продолжам понатаму“, додаде ветеранот.
Неодамна се појавија информации дека Дејвид Бекам направил обид да го привлече Хрватот во Интер Мајами. Сепак, желбата на Модриќ е да го исполни договорот со Реал Мадрид, кој истекува следното лето.
