Фудбалерите на Аргентина стартуваа со победа во новиот циклус јужноамерикански квалификации, откако како домаќини го победија Еквадор со 1-0. Три бода освои и Колумбија, додека Парагвај и Перу ремизираа – 0-0.
Централниот меч беше меѓу светскиот првак и Еквадор, кој го реши Лионел Меси.
Аргентинците долго се мачеа, тешко создаваа шанси бидејќи имаа само три удари кон голот, а еден заврши во мрежата. Во 78. минута, Меси ја намести топката и од слободен удар по којзнае кој пат маестрално го изведе за конечен триумф.
Лионел Скалони изведе состав кој ја одведе Аргентина и на светскиот трон, единствено изненадување беше Николас Гонзалес, кој во вториот дел беше заменет со стандардниот Ди Марија.
Како домаќин славеше и Колумбија со минимални 1-0. Колумбијците ја победија Венецуела со голот на Боре во 46. минута.
Во третиот натпревар Парагвај и Перу одиграа без голови.
