УЕФА веќе го подготви планот за репрезентативните натпревари до крајот на календарската година кој само треба да биде потврден на 17. јуни на состанокот на Извршниот комитет.
Јасно е дека престојнава есен ќе биде повеќе од активна за националните тимови кои ќе стартуваат со септемвриските натпревари од втората сезона во Лигата на нации. Македонија во Лигата Ц во септември се очекува да ги одигра првите две кола од новиот циклус, против Ерменија на 5. септември во Скопје и против Грузија на 8. септември на гостински терен. За октомври, пак, се предвидени 3. и 4. коло.
Со оглед на значењето на натпреварите, пак, бараж-пресметките за пласман на ЕП, односно полуфиналето и финалето, исто така ќе се играат оваа есен но во различни прозорци а не во неколку денови како што беше претходно планирано.
Македонија во октомври во Скопје треба да го игра и полуфиналето со Косово за пласман на ЕП, а денот Д околу пласман на собирот на најдобрите на Стариот континент, односно евентуалната финална пресметка против Грузија или Белорусија треба да се игра на почетокот од ноември. Во ноември ќе се одиграат и последните две кола од новата Лига на нациите.
