Во Германија повторно се појавија сомнежи за возраста на напаѓачот на Борусија Дортмунд, Јусуфа Мукоко, кој официјално се смета дека има 18 години. Во германските медиуми се сомневаат дека младиот талент на „жолто-црните“ е постар отколку што изгледа.
Оттаму цитираат информации од австрискиот медиум „Лаола1“, кој тврди дека веќе во летото минатата година, посвоителот на Мукоко на новинар му испратил извод од матична книга на родените, според кој фудбалерот всушност има 22 години, но документот бил стопиран за да биде објавен по законски пат.
Веста доаѓа неколку дена откако беше откриено дека повеќето играчи на Камерун во репрезентацијата до 17 години се всушност над таа возрасна граница. Напаѓачот од Камерун се преселил во Германија во 2014 година.
Не е првпат да има сомнежи дека Мукоко си ги фалсификувал годините. Уште во 2017 година имаше наводи за ова, но тогаш германската федерација потврди дека датумот на раѓање на играчот е 20 ноември 2004 година.
