Фудбалерите на Барселона ја продолжија серијата лоши резултати, а последен во редот е поразот од Атлетико Мадрид на „Ванда Метрополитано“ со 2-0. Она што е особено загрижувачки е што Барселона практично немаше конкретна можност пред голот на Јан Облак.
За тоа е свесен и искусниот каталонски дефанзивец Жерар Пике, кој признава дека ситуацијата е крајно компликувана.
„Ние страдаме, морам да бидам искрен. Ова е многу компликувано. Да се играше натпреварот уште три часа, немаше да постигнеме гол. Не бевме конкретни. Има неколку проблеми, не постои само еден. Се наоѓаме во тешка ситуација, никогаш не сме се нашле во ваква ситуација “, вели стоперот на Барселона.
Тој додаде дека атмосферата во соблекувалната е одлична и дека секој има желба да ги сврти работите во своја полза.
На прашањето за односот меѓу Лапорта и Куман, Пике истакна дека играчите не можат да направат речиси ништо по тоа прашање.
„Наша работа е да излеземе на терен и да го дадеме најдоброто од себе. Некогаш е добро, некогаш не. Овие резултати, се разбира, не ги посакуваме. Мораме да продолжиме да работиме и да се свртиме кон следниот натпревар“, потенцира Жерар Пике.
