Тренерот на Рома, Клаудио Раниери, откри дека клубот веќе има постигнат договор со негов наследник, кој ќе го преземе тимот во летниот период.
„Секако, сè е веќе договорено. Но, од претседателот зависи кога ќе одлучи да го објави тоа“, изјави Раниери во интервју за италијанскиот весник „Ла Република“.
Во италијанската јавност се шпекулира со неколку големи имиња кои би можеле да го наследат Раниери, меѓу кои Масимилијано Алегри, Маурицио Сари, па дури и Јирген Клоп.
„Дури и брат ми ме повика да ме праша: ‘Барем на мене кажи, сите прашуваат’. Токму затоа не ти кажувам, за да не се прошири“, додаде Раниери, со доза на хумор.
Иако ќе се повлече од клупата, Раниери нема целосно да ја напушти Рома.
„Ќе бидам советник. Често разговарам со претседателот, му кажувам што функционира, а што не. Тој слуша и реагира“, појасни искусниот стратег.
Клаудио Раниери дојде во Рома во тешки времиња за клубот и помогна во стабилизирање на тимот, а сега ќе продолжи да делува од поинаква позиција, зад сцената.
