Фудбалската репрезентација на Македонија е пред нов предизвик во Лигата на нации, две врзани гостувања и дуели против Летонија и против Ерменија.
Дефанзивецот Јован Манев вели дека самодовербата кај репрезентативците е на високо ниво, не сакаат да потценат никого, но дека размислуваат за триумф на првиот меч во Рига. По одиграниот дуел со Летонија, потоа мислите ќе се насочат и кон пресметката со Ерменија во Ереван.
„Од натпревар во натпревар има разлика. Ние никогаш не потценуваме никого, затоа што во фудбалот не постојат фаворити. Ќе пристапиме максимално во Летонија и ќе ги освоиме трите бода, а потоа сите мисли ќе ги насочиме кон Ерменија“, изјави Манев.
