Милан Илоски игра во одлична форма во дресот на Филаделфија унион, но и покрај одличните настапи нема да биде дел од македонската репрезентација во претстојниот циклус.
Дваесет и седумгодишниот напаѓач сезонава постигна 12 гола и запиша две асистенции во МЛС-лигата, со што е меѓу најефикасните фудбалери на Филаделфија унион.
Неговите настапи се следат од стручниот штаб на Македонија, но селекторот Гоце Седлоски откри дека Илоски одлучил приоритет да му биде клубот и завршницата од сезоната во МЛС.
„Сакав да го повикам Илоски за натпреварот во Данска, но преку Николче Новески ни кажа дека приоритет му е клубот и борбата за клупските цели. Се обидовме да ја преиспитаме неговата одлука, но во овој момент тоа е неговата одлука.
Го следам, но никого нема да молиме да игра за Македонија“, изјави Седлоски.
Илоски останува под будното око на репрезентативниот штаб, а неговите настапи во МЛС ќе продолжат да бидат следени и во периодот што следува.
