Столе Димитриевски прослави еден многу посебен 32. роденден. Македонскиот голман постојано беше прилепен до телефонот, и тоа не само за да прима честитки. Тој размислува за трансфер во текот на зимскиот преоден рок, откако сфати дека ќе биде невозможно да се избори за стартна позиција во конкуренција со Хулен Агирезабала во Валенсија.
Изјавите што ги даде во Македонија за време на последниот собир со репрезентацијата создадоа точка од која нема враќање, а неговите агенти веќе ги разгледуваат понудите од европски клубови.
Пазарот на голмани не е преголем, а Димитриевски ужива многу добра репутација низ Европа. Во таа насока, неколку екипи се распрашале за неговата ситуација во Валенсија. Според весникот „АС“, меѓу нив се Борнмут од Премиер-лигата, белгискиот Клуб Бриж, кој моментално настапува во Лигата на шампионите, како и италијанска Џенова.
Договорот на Димитриевски со Валенсија истекува следниот јуни, па евентуалното заминување би ослободило простор во платниот фонд, особено ако се земе предвид дека клубот веќе располага со уште еден голман, Кристијан Риверо, кој би можел да ја преземе улогата на резерва. Македонскиот чувар на мрежата сезонава има само 180 минути настап, и тоа во натпреварите од Купот на кралот против Марасена и Картагена. На вториот меч беше клучен, откако во 90. минута одбрани решавачки пенал и ѝ обезбеди пласман на својата екипа во следната рунда.
