Фудбалерите на Шкендија вечерва (20 часот) го пречекуваат словенечкиот претставник Браво во реваншот од квалификациите за Конференциската лига, со надеж дека ќе ја надополнат негативата од еден гол (1-2) од првиот натпревар одигран во Љубљана и ќе обезбедат пласман во следната рунда.
Раководството на тетовскиот клуб направи потег кој наиде на големо одобрување кај навивачите – влезот на арената ќе биде бесплатен, со цел трибините да бидат исполнети и тимот да добие дополнителна поддршка во клучниот европски дуел.
Тренерот Атим Положани го поздрави потегот на управата и истакна дека врската меѓу Шкендија и нејзините навивачи е посебна.
„Ова дефинитивно е добар гест од нашата управа. Поврзаноста меѓу Шкендија и навивачите е огромна. Сакам да нагласам дека навивачи на Шкендија не се само „Балистите“, кои ни дадоа огромна поддршка и во Словенија, туку сакаме да привлечеме што поголем број наши приврзаници. Ги повикувам сите да дојдат на стадион и да ни помогнат да стигнеме до посакуваната победа“, изјави Положани.
Со слична порака се јави и фудбалерот на Шкендија, Дрилон Ислами, кој смета дека поддршката од трибините може да биде клучна за пласман во следната фаза.
„Ова е потег на нашата управа кој заслужува пофалби. Нè очекува европски натпревар против квалитетен противник. Ги поканувам сите фанови, нашите „Балисти“, но и сите останати навивачи да дојдат и да ни дадат поддршка. Се надевам дека на крајот заеднички ќе го прославиме пласманот во следната рунда“, порача Ислами.
