Реал го победи тимот на Севилја со 2-0 на „Бернабеу“ во 18. коло од Ла Лига. Најмногу внимание по натпреварот привлекоа свирежите од навивачите насочени кон Винисиус Жуниор. Тој во седумгодишната кариера во Реал одигра 346 натпревари, постигна 111 голови и имаше 91 асистенција. Во овој период освои низа трофеи, меѓу кои најважни се две титули во Лигата на шампионите и три во Ла Лига.
На натпреварот против Севилја тој беше капитен, но навивачите се разочарани од неговото однесување за време на последната криза во клубот, кога Реал го загуби водството во Ла Лига.
Во тој период, Винисиус беше во конфликт со тренерот Чаби Алонсо, а навивачите јасно го покажаа своето незадоволство. Тие му свиркаа од почетокот на мечот па сè до 83. минута, кога тој беше заменет со Гонзало Гарсија.
Снимки од свирежите на „Бернабеу“ покажаа како Винисиус реагирал на нив уште на самиот почеток.
„Што да направам? Ова е првата акција на натпреварот… по ѓаволите!“, изјавил тој кон клупата на Реал, очигледно шокиран од реакцијата на навивачите.
По завршувањето на мечот, разочаран од свирежите, Бразилецот брзо ја смени својата профилна фотографија на Инстаграм. Неколку минути по последниот свиреж, додека сè уште беше во соблекувалната, ја отстрани сликата со дресот на Реал и ја замени со фотографија од настап за бразилската репрезентација.
