ФК Порто ја изненади фудбалската јавност со официјалната објава дека Тијаго Силва се приклучува на клубот. Искусниот бразилски дефанзивец, на 41 година, ќе настапува на „Драгао“ по раскинувањето на договорот со Флуминенсе.
Легендарниот стопер се обрати до навивачите преку видео на официјалните канали на клубот, изразувајќи голема радост од враќањето:
„Среќен сум што се враќам кај ‘змејовите’ и мотивиран сум за оваа шанса. Му благодарам на претседателот, Андре Вилјаш-Боаш, и на тренерот Франческо Фариоли. Со нетрпение очекувам повторно да ги облечам овие бои и се надевам на вашата поддршка на ‘Драгао’“, рече Силва.
Овој трансфер означува емотивен повраток во клубот каде што Силва првпат настапуваше во 2004 година. Тогаш, како член на Б-тимот, се соочи со сериозен предизвик во кариерата кога му беше дијагностицирана туберкулоза, што го принуди да го прекине својот прв престој во Португалија. По повеќе од дваесет години, се враќа за да ја заврши започнатата приказна.
Тијаго Силва потпиша договор до крајот на сезоната, со можност за продолжување уште една година, и пристигнува како слободен играч.
Со бразилската репрезентација, Силва настапи на четири Светски првенства: Јужна Африка 2010, Бразил 2014, Русија 2018 и Катар 2022.
