Вардар беше во длабока провалија, пред само неколку месеци, а сега е во финалето на Купот на Македонија. Напорната работа даде резултат, коцките конечно се наместија со ангажманот на Гоце Седлоски за шеф на стручниот штаб, но и откако раководството на клубот доведе неколку квалитетни фудбалери за вториот дел од сезоната.
Вардарци влегоа во серија од 12 меча без пораз, забележаа неколку значајни победи во шампионатот и побегнаа од бездната, а истовремено ја искористија шансата и да стигнат до финалето на Купот.
Ова е голем резултат, ако се знае дека цели 18 години „црвено-црните“ не биле дел од финалето на националниот Куп. Со метеорска брзина работите одат на подобро во најтрофејниот клуб, а се чини дека најважно е анулирањето на натрупаните долгови и одблокирањето на клупската жиро-сметка по цели осум години.
Секако, допрва за Седлоски и фудбалерите ќе следи главниот чекор, затоа што само успех во финалето на Купот, каде противник ќе биде Струга Трим Лум, ќе значи и освојување трофеј, но и излез на европска сцена, што дополнително би го консолидирало клубот и на финансиски план.
