Вардар лесно му даде три гола на Работнички

Вардар оствари убедлива победа против Работнички (0-3) на натпреварот што се одигра на стадионот на ФФМ.

Веќе во првиот напад Вардар веднаш го погоди дирекот преку Цветковиќ, а во осмата минута дојде и до водство.

Омерагиќ продре по левата страна, уфрли во петерецот, а Закариќ погоди за 0-1.

Во 17 минута, Вардар ја удвои предноста. На нафрлувањето од десната страна слабо реагираше Ондоа, дуелот го доби Азер Омерагиќ и ја затресе мрежата на Работнички.

Талаков ја имаше првата шанса за Работнички во 37 минута. Од десната страна шутираше од 12 метри барајќи го спротивниот агол, но Давор Талески одлично интервенираше.

Во 48 минута, прекрасен гол на Стефан Цветковиќ, за 0-3. Се одлучи на удар од работ на шеснаесетникот од левата страна и погоди во спротивниот горен агол.

Во 70 минута, Дашмир Елези беше во шанса да постигне почесен гол за Работнички, но Давор Талески добро интервенираше.

Заслужен триумф на вардарци и нови три бода.