Унаи Емери го коментираше успехот на Астон Вила од 1-2 против Челси на „Стемфорд бриџ“ во натпреварот од 18. коло на англиската Премиер – лига.
„Го задржавме истиот план на игра како и во првото полувреме, но тие одиграа фантастично во првиот дел. Доминираа. Ни беше тешко да ја контролираме топката. Се браневме длабоко, се браневме добро. Речиси и не им дозволувавме корнери во близина на нашиот гол – дозволивме само еден и тие постигнаа гол. Но моравме да покажеме страст и да се обидеме да останеме издржливи, и за тоа зборувавме во соблекувалната по првото полувреме“, изјави Емери.
Шпанскиот стратег зборуваше и за улогата на Оли Воткинс, кој ги постигна двата гола за тимот на „Стемфорд Бриџ“.
„Тој беше многу, многу фокусиран. Кога се држи до планот на игра и ги извршува своите задачи, обично ја подобрува својата статистика, а головите што ги постигна беа фантастични“, додаде Емери.
Ова беше 11. последовна победа за тимот од Бирмингем во сите натпреварувања, со што заостанувањето зад лидерот Арсенал остана само три бода. На почетокот на декември Астон Вила ги совладаа „топчиите“ со 2-1 на „Вила Парк“, а по неколку дена избраниците на Унаи Емери ќе ја завршат 2025 година со натпревар против истиот ривал, но овојпат во Лондон на „Емирати“.
„Играме против Арсенал и имаме намера да се бориме. Нема да зборуваме за нашите цели во првенството до 34. коло, затоа што има екипи со огромен потенцијал да освојуваат бодови – како Ливерпул, Челси, а во моментов тие се поконкурентни од нас за врвните позиции. Секако, играме многу добро, во серија сме на победи, одиме одлично. Во првото полувреме игравме фантастично, иако имавме одредени тешкотии. Но во второто полувреме – како и во текот на целата сезона – стануваме сè подобри и сè уште остануваме скромни“, додаде Емери.
На крајот, тој повторно истакна дека неговиот тим сè уште не е дел од трката за титулата, бидејќи до крајот на сезоната има уште многу време.
„Шампионатот се состои од 38 натпревари. Ако заврши утре, мечот против Арсенал навистина би ставил крај на сезоната. Но сè уште остануваат околу 20 натпревари“, заклучи Емери.
