Македонскиот фудбалски стратег направи голем чекор во кариерата и го презеде кормилото на еден од најголемите клубови во Словенија, потпишувајќи едногодишен договор со опција за продолжување.
По одличната сезона во Радомље, каде што остави силен впечаток, 49-годишниот Тренчовски доби доверба да го предводи словенечкиот шампион.
Тренчовски зад себе има богато искуство — работеше во Кувајт (Ал-Араби) и Македонија (Брера, Беласица, Хоризонт Турново, Кожуф), а беше и спортски директор на Академија Пандев и селектор на македонската У19 репрезентација. Познат е како стратег кој развива млади играчи и им дава максимална слобода во играта.
На официјалната промоција, македонскиот стручњак не го криеше воодушевувањето од новиот ангажман:
„Ова е најголемиот предизвик во мојата кариера. Огромна чест е да се води најголемиот клуб во Словенија. Кога Олимпија ве повикува, пешки ќе тргнете од Македонија само за да стигнете тука.
Олимпија секогаш мора да се бори за трофеи. Сакам доминантен, брз и напаѓачки фудбал. Барам од играчите да немаат страв од грешки, туку да играат со храброст и висока самодоверба.“
Пред Тренчовски сега е најголемиот испит досега — од него се очекува нападот на словенечката титула и забележителен резултат во европските купови со популарните „змејови“.
