Трагична вест пристигнува од Црна Гора, каде што поранешниот фудбалски репрезентативец на оваа земја, Андрија Делибашиќ, ја загуби најважната битка.
Поранешниот голгетер на Партизан имаше само 43 години, но веќе две години се бореше со тешка болест, откако му беше дијагностициран тумор на мозокот. Тој беше опериран во Белград, а подоцна стана и спортски директор на Будуќност, но болеста се врати и, за жал, борбата имаше тажен крај за Делибашиќ.
Делибашиќ како 14-годишно момче пристигна во Партизан од Сутјеска, минувајќи девет години во српскиот фудбалски гигант. Пет сезони беше дел од првиот тим на „црно-белите“ и постигна гол во групната фаза од Лигата на шампионите против Порто во сезоната 2003/04, кога на клупата на португалскиот тим беше Жозе Мурињо.
Потоа настапуваше за Мајорка, Бенфика, Брага, АЕК, Беира Мар, Реал Сосиедад, Рајо Валјекано, Рачабури од Тајланд и Сутјеска, клубот во кој во 2015 година ја заврши својата играчка кариера.
