Шокантни информации пристигнуваат од Еквадор, каде што поранешниот фудбалски репрезентативец Марио Пинеида трагично го загуби животот во насилен напад во градот Гвајакил. Во истиот инцидент смртно настрадало и женско лице, чиј идентитет засега не е познат.
Првичните шпекулации беа дека станува збор за неговата сопруга, но подоцнежните информации открија дека Пинеида во моментот на нападот бил во друштво на непозната жена и својата мајка. Мајката преживеала, но се здобила со повреди.
Сликите и видеата кои кружат од местото на настанот се вознемирувачки, а клубот Барселона од Гвајакил официјално ја потврди трагичната смрт на својот фудбалер.
„Со огромна тага ја известуваме јавноста дека нашиот играч Марио Пинеида го загуби животот во насилен напад. Оваа трагедија длабоко нè погоди сите во клубот“, стои во соопштението на Барселона.
Надлежните органи започнаа истрага, но засега нема официјални информации за идентитетот на напаѓачот, ниту за можните мотиви зад овој крвав настан.
