Тијаго Мота ќе биде отпуштен од Јувентус во текот на денешниот ден, тврдат извори од Италија. Тој нема да ја предводи „старата дама“ на претстојниот натпревар против Џенова, како што се очекуваше, туку ќе биде сменет веднаш.
Раководството на клубот веќе го избра неговиот наследник – Игор Тудор.
Претходно се сметаше дека Мота ќе добие уште една шанса да го зачува своето место на дуелот со Џенова, но изгледа дека челниците на Јувентус донеле друга одлука. Исто така, досега фаворит за негов наследник беше Роберто Манчини, но и тука има промена, па сега Тудор е главниот кандидат за клупата на Јуве.
Хрватскиот стратег веќе постигнал договор со Јувентус и ќе потпише краткорочен договор до јуни, со можност за продолжување уште една година.
Поранешниот дефанзивец на Јувентус ќе се врати во клубот, но овојпат како главен тренер. Тој добил предност пред Манчини бидејќи се согласил на пократок договор, додека италијанскиот стратег барал подолгорочна соработка.
Тудор досега ги водеше Хајдук, ПАОК, Карабукспор, Галатасарај, Удинезе, Верона, Марсеј и Лацио, но нема позначајни трофеи во својата тренерска кариера. Во 2020 година беше дел од Јувентус како асистент на Андреа Пирло.
