Напаѓачот на Реал Мадрид, Килијан Мбапе, ќе добие суспензија од еден до три натпревари поради црвениот картон кој го доби против Алавес во 31. коло на Ла Лига. Французинот направи груб фаул над Антонио Бланко, што доведе до директно исклучување.
Иако првичните информации наведуваа дека Мбапе може да биде суспендиран за четири или повеќе натпревари, што значеше дека ќе го пропушти и финалето на Купот на кралот против Барселона, новите детали кои ги објави „Ел Мундо“ покажуваат дека главниот судија, Сесар Сото Градо, во својот извештај напишал дека Мбапе бил во потрага по топката, што може да ја намали казната.
Очекувањата сега се дека суспензијата ќе биде ограничена на максимум три натпревари.
Во меѓувреме, Реал Мадрид го победи Алавес благодарение на голот на Едуардо Камавинга непосредно пред да дојде до исклучувањето на Мбапе. Победата им овозможи на „кралевите“ да останат на четири бодови заостанување зад лидерот Барселона и да продолжат да се борат за титулата во Ла Лига.
