Поранешниот капитен на македонската репрезентација, Стефан Ристовски, по завршувањето на тековната сезона ќе го напушти хрватскиот шампион Динамо Загреб. Како што пренесуваат хрватските медиуми, искусниот дефанзивец одбил да го продолжи договорот со „Модрите“, откако му бил понуден нов договор со значително пониски финансиски услови.
Неделниот натпревар против Вараждин ќе биде неговиот последен во дресот на Динамо, со што ќе стави крај на една значајна етапа во својата кариера. Иако Динамо ќе се обиде да стигне до нова шампионска титула, Ријека важи за главен фаворит за трофејот во пресрет на последното коло.
Иднината на Ристовски засега останува неизвесна, но се шпекулира дека неколку клубови од Блискиот Исток се заинтересирани за неговиот потпис. Доколку се остварат тие шпекулации, тоа би значело нов интернационален предизвик за 32-годишниот бек.
Ристовски е веројатно првиот од т.н. „сенатори“ кој ќе си замине од „Максимир“, но не е исклучено дека неговиот пример ќе го следат и други, како Аријан Адеми, Даниел Загорец, па дури и Бруно Петковиќ, во зависност од развојот на преговорите со новиот спортски директор на клубот, Звонимир Бобан.
