Репрезентацијата на Србија доживеа уште еден тежок пораз. Во пријателски натпревар одигран во Толука, селекцијата на Мексико славеше убедлива победа против Србите од 5-1.
За српскиот национален тим ова е втор убедлив пораз во период од само неколку дена, откако претходно загуби и од Зеленортски Острови со 3-0.
Србија прва дојде до водство преку Петар Станиќ во 19. минута, но домаќините брзо се вратија во натпреварот. Јохан Васкез израмни во 34. минута, а непосредно пред паузата автоголот на Стефан Бокинац му донесе предност на Мексико.
Во второто полувреме домаќините целосно доминираа. Раул Хименез зголеми на 3-1 во 57. минута, а потоа следуваше уште еден автогол во српската мрежа, овојпат дело на Адем Авдиќ. Конечните 5-1 ги постави Луис Чавез во самиот финиш на средбата.
За Мексико, кој е еден од домаќините на претстојното Светско првенство 2026, овој триумф претставува дополнителен поттик во пресрет на најголемиот фудбалски настан.
