Тренерот на Јувентус, Лучијано Спалети, и покрај ремито 1-1 против Лече, јавно застана зад својот тим и упати пофалби за прикажаното на теренот. Иако „старата дама“ пропушти шанса да дојде до победа поради слаба завршница, искусниот стратег смета дека екипата оди во вистинска насока.
Спалети отворено укажа на главниот недостаток во играта, но и се осврна на дилемите околу изведувањето на пеналите.
„Мораме да бидеме попаметни и поконкретни во противничкиот шеснаесетник. Создававме опасност и во двата дела од натпреварот, но ни недостасуваше вистинскиот завршен потег. Тука има простор за напредок. Сепак, одигравме квалитетен натпревар, навистина квалитетен. Резултатот е важен, но уште поважно е што се гледа напредок во играта. Ако продолжиме во овој ритам, победите ќе дојдат“, порача Спалети.
Во врска со пеналите, тој појасни:
„Дејвид е еден од нашите изведувачи и ја презеде одговорноста, но едноставно немаше среќа – ударот не беше доволно висок. Покрај него, пенали можат да шутираат и Локатели, Јилдиз… Тие одлуки се носат во самиот момент, под влијание на емоциите. Од страна можеби изгледа поинаку, но на теренот ситуацијата е сосема различна“, заклучи тренерот на Јувентус.
