Тренерот на Јувентус, Лучијано Спалети, смета дека Интер и понатаму е најсилниот тим во Серија А. Италијанскиот стратег истакна дека неговиот тим има уште многу работа пред себе за да го достигне нивото на „нероаѕурите“.
Јувентус и Интер ќе ги одмерат силите во пријателски натпревар во Перт, Австралија, а Спалети очекува дуелот да биде одлична можност неговите играчи да покажат колку напредувале.
„Ова се натпревари кои многу ти помагаат да дознаеш повеќе за менталитетот на тимот и да видиш дали работиме во вистинската насока. Интер е многу силен тим и мораме да бидеме компактни во секој момент од натпреварот, бидејќи во спротивно ќе бидеме казнети.
Ќе играме против најсилниот тим во нашето првенство, а ние мораме да научиме уште многу работи за да стигнеме до нивното ниво“, изјави Спалети.
Спалети беше прашан и колку време на теренот ќе добие Кенан Јилдиз, кој претходно настапи против Челси.
„Ќе игра повеќе отколку против Челси. Денес на тренингот немавме тројца-четворица играчи, бидејќи мора да го балансираме оптоварувањето и заморот кој се акумулира.
Ќе видиме дали Кенан ќе биде стартер, но мислам да му дадам едно полувреме“, објасни италијанскиот тренер.
Спалети зборуваше и за нападот на Јувентус и за тоа дали тимот има доволно квалитет за да го надомести заминувањето на Душан Влаховиќ.
По доаѓањето на Рандал Коло Муани, Џеф Екатор и Керим Алајбеговиќ, тренерот верува дека „бјанконерите“ имаат доволно опции.
„Мислам дека доведовме играчи кои заедно ќе ги надминат бројките што ги имавме. Не е најважно да имаме еден играч кој ќе постигне 20 гола. Оваа сезона ќе биде специфична бидејќи ќе играме во четврток и недела, па ќе биде тешко постојано да се потпираме на истите фудбалери.
Лигата на Европа те ангажира дури и повеќе од Лигата на шампионите. Дури и без физички моќен централен напаѓач, го имаме Екатор, кој поседува дел од тие карактеристики, додека Коло Муани доминира во тој простор.
Ситуацијата е отворена, но со играчите што ги имаме и со она што го направивме на трансфер-пазарот, верувам дека преку тимската игра ќе можеме да го надоместиме тоа.
Алајбеговиќ може да постигнува голови. Засега сме мирни“, заклучи Спалети.
