Бешикташ категорично демантира дека ќе се раздели со тренерот Оле Гунар Солскјер. Претходно се шпекулираше дека раководството размислува за тренерска смена по елиминацијата од квалификациите за Лига Европа, каде турскиот клуб беше убедливо совладан од Шахтјор Доњецк со вкупни 2-6.
Како главен фаворит за наследник на Солскјер се споменуваше Нури Шахин, но клубот реагираше официјално:
„Извештаите во печатените и електронските медиуми, повикувајќи се на странски извори, за наводна разделба со нашиот тренер Оле Гунар Солскјер и потпишување со Нури Шахин – се неточни“, стои во соопштението на истанбулскиот клуб.
Следен предизвик за Бешикташ е пласман во групната фаза од Конференциската лига, каде во квалификациите ќе се соочи со ирскиот Сент Патрикс. Воедно, клубот го започнува настапот во новата сезона од турската Суперлига со гостување кај Кајсериспор.
