Соиграчот на Кристијан Ериксен во Волфсбург, Патрик Вимер, откри дека бил шокиран од новиот срцев инцидент на данскиот репрезентативец за време на контролниот натпревар со Украина на 7 јуни, но не и изненаден.
„Тој нè предупреди. Во Волфсбург знаеме дека ваква ситуација може да се случи во секој момент“, изјави австрискиот репрезентативец Вимер за весникот „Кроне“.
„Веднаш му пишав и стапив во контакт со луѓето од стручниот штаб на Волфсбург. Тоа е најважно во моментов“, додаде фудбалерот, кој чувствува олеснување поради стабилната состојба на Ериксен и неговото подобрување.
„Добро сум и се наоѓам дома со моето семејство. Сакам да ги смирам сите: оваа ситуација не е како онаа од 2021 година“, напиша Данецот на својот профил на Инстаграм.
„Тој е фантастичен фудбалер, уште подобар човек, а пред сè татко и столб на своето семејство. Најважно за него во моментов е да пронајде сигурност и спокој – и внатрешен и надворешен“, истакна Патрик Вимер.
