Менаџерот на Ливерпул, Арне Слот, изјави дека тој и неговите играчи го споделуваат разочарувањето на фановите, откако навивачите го искажаа тоа со силни исвиркувања по четвртото последовно реми на тимот во Премиер – лигата. „Црвените“ одиграа 1-1 на „Енфилд“ против Барнли, кој се наоѓа во опасност од испаѓање, и сега заостануваат седум бода зад врвната тројка.
Ливерпул останува без победа во Премиер – лигата оваа година, откако не успеа да го победи претпоследниот тим на табелата на домашен терен.
„Во мојата глава размислував за исвиркувањата, но имаше и разочарување. Ние сме Ливерпул, игравме против Барнли и треба да им оддадеме признание за тоа како се бранеа и како го исполнуваа сè што сакате да видите ако сте менаџер на противничкиот тим.
Но, ако ние, како Ливерпул, не би биле разочарани од реми дома против Барнли, тоа би било целосно нетипично. Го разбираме разочарувањето. Можам да ви кажам дека го чувствувам истото и играчите дефинитивно го чувствуваат истото разочарување.
Тешко е за играчите да почувствуваат дека напредуваме и дека тие напредуваат, ако резултатите не се такви какви што сакаме. Нашите стандарди се повисоки од тоа да не губиме – нашите стандарди се да победуваме на секој натпревар“, изјави Слот.
