Шкендија не успеа да остане непоразена на гостувањето кај Хибернијан, иако долго време имаше резултат кој ѝ одговараше. Македонскиот вицешампион загуби со 2-1 во првиот натпревар од третото квалификациско коло во Конференциската лига, па на реваншот во Скопје ќе мора да брка победа за продолжување на европската авантура.
Тетовци одиграа зрел и борбен натпревар на „Истер Роуд“, особено во првото полувреме, кога успешно ги запреа нападите на шкотскиот тим. Хибернијан имаше иницијатива и поголем посед, но одбраната на Шкендија беше на висина на задачата и не дозволи сериозна опасност пред својот гол.
Слична беше сликата и во продолжението. Тимот на Шкендија тактички одлично го контролираше натпреварот, ги затвори просторите и долго време ги оставаше домаќините без вистинска завршница.
Сепак, во 73. минута Хибернијан успеа да го пробие бедемот на македонскиот состав. Рајт создаде простор по левата страна и испрати прецизна топка во шеснаесетникот, а Елдинг со одличен удар со петица од прва го отвори резултатот.
Одговорот на Шкендија беше експресен. Само три минути подоцна, резервистот Марко Ѓорѓиевски уште еднаш покажа дека е фудбалер за големи моменти. По асистенција од Арбин Зејнулаи напаѓачот погоди за 1-1 и донесе голема надеж за позитивен резултат.
Но, кога сите очекуваа натпреварот да заврши без победник, Хибернијан зададе удар во судиското надополнување. По еден корнер и голема гужва во шеснаесетникот, О’Хора успеа да ја испрати топката во мрежата за конечни 2-1.
Шкендија сепак има за што да се надева. Минималниот пораз остава простор за пресврт, а реваншот на Арената „Тодор Проески“ ќе биде одлучувачки. Со поддршка од домашната публика, тетовскиот тим ќе се обиде да ја надополни негативата и да обезбеди пласман во плеј-оф фазата, каде што го чека подобриот од двомечот меѓу Гетеборг и Гент.
