Шкендија Арачиново и Силекс одиграа неизвесен натпревар во Чаир, кој заврши со реми 1-1. Средбата беше исполнета со многу возбудувања, два досудени пенали, ВАР-интервенција и неколку извонредни одбрани, па на крајот двата тима ги поделија бодовите.
Во првото полувреме се играше внимателно, со мал број вистински шанси. Домаќините поведоа во 32. минута, кога по прекршок во казнениот простор судијата покажа на белата точка. Капитенот Бесир Демири беше сигурен реализатор и го постигна водечкиот погодок, кој воедно е и првиот гол на Шкендија Арачиново во Првата македонска фудбалска лига.
До паузата домашните можеа да ја зголемат предноста, но ударот на Симоновски по корнер заврши непосредно над голот. На другата страна, Силекс ја затресе мрежата во самиот финиш од првиот дел, но погодокот беше поништен поради офсајд.
Продолжението донесе далеку поотворена игра. Силекс беше поконкретен и преку Богдановски и Мишов создаде неколку добри можности, но голманот Столевски со одлични интервенции ја сочува предноста на својот тим.
Највозбудливиот период следуваше во последните петнаесетина минути. Најпрво Шкендија Арачиново пропушти идеална можност да го реши натпреварот, кога Ливарека од непосредна близина ја погоди стативата. Само неколку моменти подоцна, Силекс доби пенал, но Столевски со фантастична одбрана го запре ударот на Богдановски.
Гостите сепак стигнаа до заслужено израмнување во 82. минута. По ВАР-проверка, судијата досуди нов пенал за Силекс по прекршок врз Богдановски, а Хасукиќ беше прецизен од 11 метри и ги постави конечните 1-1.
Во следното коло Шкендија Арачиново ќе гостува кај Тиквеш во Кавадарци, додека Силекс пред своите навивачи ќе го пречека составот на Скопје.
