Левски Софија продолжува со европската авантура. Бугарскиот тим повторно славеше со 1-0 против Каират, овојпат на гостински терен, и со вкупни 2-0 обезбеди пласман во плејофот за Лигата на шампионите.
Левски на реваншот отпатува со минимална предност од првиот натпревар во Софија, но уште еднаш одигра дисциплинирано и не му дозволи на казахстанскиот тим да се врати во двомечот.
Гостите до водство стигнаа уште во 13. минута, кога Реиналдо ја затресе мрежата на Каират и практично го насочи натпреварот во посакуван правец за својот тим.
До крајот на средбата Левски успешно ја зачува предноста и заслужено се пласира во следната рунда.
Македонскиот репрезентативец Никола Серафимов го одигра целиот натпревар и даде голем придонес во големиот успех на бугарскиот клуб.
Левски сега го дели уште само еден чекор од пласманот во главната фаза на елитното европско натпреварување.
