На крајот од годината магазинот „Форбс“ ја објави листата на 50 клубови со најголема вредност и на неа доминираат екипите кои се дел од НФЛ лигата, а меѓу нив се само четири фудбалски клуба од Европа.
За разлика од 2024 на листата ги нема Манчестер Сити, Баерн и Пари Сен Жермен, а во конкуренција останаа Реал Мадрид, Манчестер Јунајтед, Барселона и Ливерпул.
Водечки од фудбалските клубови е мадридски Реал кој е проценет на 6,75 милијарди и се наоѓа на 20. место.
Клубот од „Олд Трафорд“ и покрај резултатската криза се уште високо котира и со проценета вредност од 6,6 милијарди долари и ја дели 24. позиција со НФЛ тимот Тампа Беј.
Зад водечкиот фудбалски двоец е Барселона со сума од 5,65 милијарди е се наоѓа на 42. место.
Ливерпул има драстичен пад и од 27. место сега е 48 со вредност од 5,4 милијарди долари.
На првата позиција е НФЛ тимот Далас Каубојс со проценета вредност од 13 милијарди долари, два повеќе од поранешниот НБА шампион, Голден Стејт Вориорс, а на третото место е Лос Анџелес Ремс (НФЛ), кој е проценет на 10,5 милијарди.
Меѓу оние со најголема вредност се Ф1 тимовите на Ферари (6,5 милијарди), Мерцедес (6 милијарди). На листата доминираат тимови од НФЛ и меѓу 50 најдобри се дури 30, потоа следува НБА со 12, а по два имаат бејзбол лигата во САД, Формула 1, Ла Лига и Премиер лига.
Според „Форбс“ вкупната вредност на водечките 50 спортски организации изнесува 353 милијарди долари што е за 22 проценти повеќе во однос на 2024 година.
Како главна причина за растот на вредноста на тимовите се смета драстичното зголемување на приходите од продажбата на медиумските права.
