Реал Мадрид донесе одлука за иднината на Арда Ѓулер. Турскиот репрезентативец ќе остане на „Сантијаго Бернабеу“ уште пет години, откако двете страни постигнале договор за продолжување на соработката.
Според информациите од извори блиски до клубот, договорот е целосно усогласен и наскоро треба да биде официјализиран. Ѓулер воедно ќе добие и значително зголемување на платата.
„Договорот е завршен и комплетиран. Фудбалерот ќе добие значително зголемување на платата“, наведуваат изворите.
21-годишниот Турчин во Реал пристигна во летото 2023 година од Фенербахче за 20 милиони евра. Почетокот не му беше лесен. Често беше на клупата, а во одредени периоди не беше ниту во составот.
Сепак, Ѓулер постепено ја добиваше довербата и со своите настапи покажа зошто Реал Мадрид толку многу верува во неговиот потенцијал.
За него се интересираа и други европски гиганти, а во последниот период најмногу се поврзуваше со Челзи. Сепак, со новиот договор сите шпекулации за негово заминување од Мадрид практично паѓаат во вода.
Жозе Мурињо неодамна јавно истакна дека Ѓулер е фудбалер предодреден за големи работи, а очигледно такво мислење има и раководството на Реал.
Бројките дополнително ја потврдуваат неговата важност. Ѓулер досега одигра 116 натпревари за „Кралевите“, на кои постигна 19 гола и запиша 26 асистенции.
Новиот договор е потврда дека Реал Мадрид го гледа како дел од својата иднина. Неговата техника, креативност и чувство за последниот пас се квалитети кои можат да бидат особено важни во големите натпревари.
Конкуренцијата во Мадрид останува жестока, но Ѓулер сега добива уште поголема сигурност дека клубот смета на него. Следниот чекор е да ја оправда довербата и постепено да се наметне како еден од клучните играчи во тимот.
Приказната на Арда Ѓулер во Реал Мадрид очигледно допрва го достигнува својот вистински почеток.
