Играчот од средниот ред на Арсенал, Деклан Рајс, ќе ги остави настрана сите емоции кога в недела ќе се соочи со својот поранешен клуб Вест Хем, свесен дека победа може да ги доближи „топчиите“ до титулата во Премиер – лигата, но и да го турне неговиот поранешен тим на самиот раб од испаѓање.
На три кола до крајот, тимот на Микел Артета има пет бода предност пред Манчестер Сити, кој има натпревар помалку и може да ја намали разликата на два бода доколку го победи Брентфорд во сабота.
„Вест Хем е клубот што ми даде сè. Без него немаше да бидам тоа што сум денес и искрено верувам во тоа. Таму ми дадоа шанса кога Челси не ми ја даде. Многу луѓе во клубот навистина ме туркаа напред. Имам само убави зборови за овој клуб. Не е убаво да се гледа во каква позиција се наоѓаат во моментов, но тоа е фудбалот и јас имам работа што треба да ја завршам во недела“, изјави Рајс.
Освен што продолжуваат да се борат за титулата во Премиер – лигата, лондончани веќе обезбедија место и во финалето на Лигата на шампионите, откако во полуфиналето го елиминираа Атлетико Мадрид.
