Фудбалерите на Милан остварија минимална, но важна победа на гостувањето кај Верона (0-1) во 33. коло од Серија А.
Избраниците на Масимилијано Алегри не блескаа со играта, но сепак успеаја да дојдат до три значајни бода, прекинувајќи ја негативната серија по двата порази во домашното првенство.
Првото полувреме не донесе многу возбудувања на стадионот Бентегоди. Милан не успеваше да воспостави доминација, додека домаќините, предводени од Паоло Самарко, беа рамноправен противник.
Клучниот момент се случи во 41. минута, кога „росонерите“ изведоа брза контра. Адриен Рабио одигра со Рафаел Леао, кој му возврати со одлична топка во простор, а Французинот сигурно реализираше за водство и го совлада немоќниот Лоренцо Монтипо.
Верона можеше брзо да израмни, но ударот на Белгали беше одбранет од Мајк Мењан.
Во второто полувреме, домаќините повторно се заканија преку истиот играч, но без успех, а се обидоа и Вермесан. На спротивната страна, погодокот на Габија беше поништен по интервенција од ВАР.
До крајот се играше отворено, со шанси на двете страни – Габија спречи опасен обид на Орбан, додека Нелсон на другата страна го блокираше речиси сигурниот погодок на Салемакерс.
На крајот, Милан со многу напор ја сочува минималната предност и стигна до 66 бода, додека Верона остана закована на дното со 18 бодови, исто колку и Пиза.
