Пари Сен Жермен подготвува сериозна офанзива за ангажман на бразилскиот интернационалец од Реал Мадрид, Родриго Гоеш, откако фудбалерот очигледно не е во прв план на новиот тренер на „кралевите“, Чаби Алонсо.
Според информациите, токму тренерот Луис Енрике инсистира на неговото доведување, убеден дека Родриго ќе донесе свежина и дополнителен квалитет во нападот на парижани. Иако ПСЖ веќе располага со играчи како Кварацкелија, Дембеле, Баркола и Дезире Дуе, тренерот смета дека е потребна поголема длабочина и флексибилност во офанзивата за новата сезона.
Родриго беше стартер во дебито на Чаби Алонсо против Ал-Хилал, но потоа доби само 23 минути во последните три натпревари, што дополнително ги разгорува шпекулациите за можна разделба.
Реал Мадрид е подготвен да ги сослуша понудите, но не планира да го пушти Родриго за помалку од 80 милиони евра. На „Сантијаго Бернабеу“ веруваат дека интересот од повеќе клубови, меѓу кои и Арсенал, кој внимателно ја следи ситуацијата, може дополнително да ја зголеми вредноста на трансферот.
