По период исполнет со шпекулации за скандал со тренерот Чаби Алонсо и можно заминување, се чини дека сагата околу иднината на Винисиус Жуниор во Реал Мадрид е при крај. Епилогот, според сè, треба да биде потпишување нов договор.
Еден од најталентираните фудбалери на новата ера нема намера да го напушти „кралскиот клуб“, а решение во преговорите за продолжување на соработката е веќе на повидок.
Според медиумите, Бразилецот е свесен дека трпението на претседателот Флорентино Перез има свои граници и е подготвен на клучен компромис за да си го обезбеди останувањето. Се тврди дека ќе се откаже од бонусот за продолжување на договорот кој претходно го барал и ќе прифати годишна плата од 20 милиони евра.
Винисиус го прифатил предлогот на клубот повторно да биде еден од клучните играчи и е подготвен да се откаже од финансиските услови што ги кочеа преговорите. Иако договорот сè уште не е официјализиран, во клубот владее оптимизам дека сè може да биде завршено во следните денови или недели.
Бразилскиот напаѓач е свесен дека мора да направи чекор напред за да го врати својот статус во тимот. Во отсуство на Килијан Мбапе од него се очекува да преземе лидерска улога и да ја прекине негативната серија од 14 натпревари без постигнат гол. Оваа сезона, на 24 одиграни натпревари, тој има пет гола и осум асистенции.
