Стратегот на Шкендија, Артим Положани, не го криеше задоволството по триумфот над Браво од 3-1 и изборениот пласман во третото квалификациско коло од Конференциската лига. Тој истакна дека неговите фудбалери сосема заслужено одат понатаму, иако соочувањето со дефанзивно настроениот противник донело свои предизвици.
„Ова беше исклучително важен меч. Играчите одиграа одлично и заслужуваат сите честитки. Никогаш не е лесно да се скрши отпорот на тим што игра повлечено и ја демне својата шанса преку противнапади, но успеавме да ги неутрализираме нивните најсилни оружја и да победиме“, изјави Положани.
Шефот на стручниот штаб на тетовци посебно ја истакна психолошката стабилност на екипата, која не падна под притисок дури ни по примениот гол, туку продолжи во ист ритам.
„Најмногу ме радува што не го намаливме темпото. Продолживме да го диктираме ритамот и да веруваме во нашата филозофија. Од самиот почеток инсистираме на офанзивен фудбал и создавање шанси. Кога постојано притискате, головите мора да дојдат — без разлика дали во 15-тата, 30-тата или во последните минути од мечот“, додаде тој.
И покрај славјето и добрите моменти во нападот, Положани искрено посочи дека тимот има слабости кои мора итно да се коригираат за следните европски предизвици.
Тренерот смета дека дефанзивата реагирала премногу наивно во одредени ситуации за време на двата меча со Браво. Положани потенцираше дека на екипата ѝ недостига дополнителна сила во дуел-играта, што е клучен фактор во современиот фудбал.
„Тоа се сегменти на кои мора сериозно да работиме во периодот што следи“, заклучи кормиларот на Шкендија.
